Ymgynghoriadau'r gorffennol

Ceir trosolwg isod o’r materion y mae’r Bwrdd Taliadau wedi ymgynghori arnynt o’r blaen isod.

Mae manylion am ymgyngoriadau sy’n dal i fynd rhagddynt hefyd ar gael.

Bwrdd Taliadau Annibynnol y Senedd 2025 - presennol

Ymgynghoriad ar newidiadau cytundebol sy’n deillio o Ddeddf Hawliau Cyflogaeth 2025

Cyhoeddodd y Bwrdd Taliadau ymgynghoriad ar newidiadau cytundebol sy’n deillio o Ddeddf Hawliau Cyflogaeth 2025.

Roedd yr ymgynghoriad hwn yn ymwneud â diweddaru’r contractau safonol ar gyfer staff cymorth yr Aelodau fel eu bod yn adlewyrchu hawliau cyflogaeth newydd. Gofynnodd y Bwrdd am farn yn unig ar y newidiadau cytundebol penodol sydd eu hangen i fodloni’r gofynion statudol newydd.

Mae Deddf Hawliau Cyflogaeth 2025 yn nodi hawliau statudol newydd i weithwyr a gofynion newydd ar gyflogwyr.

Mae’r Bwrdd yn gosod y contract safonol ar gyfer staff cymorth drwy’r Penderfyniad, yn adran 7.1.1b. Mae angen i’r contract safonol adlewyrchu’r hawliau statudol newydd fel bod y sefyllfa yn glir ac yn gyson, ac fel y gall Aelodau gyflawni eu dyletswydd fel cyflogwr cyfrifol o dan Reol 11 o’r Cod Ymddygiad.

Felly, wnaeth y Bwrdd cynnal ymgynghoriad cyfyngedig ar newidiadau penodol i’r contractau Parhaol a Chyfnod Penodol. Mae angen y newidiadau hyn i adlewyrchu gofynion statudol newydd a rhaid eu cyflwyno’n gyflym. Nid yw’r Bwrdd yn ceisio barn ehangach ar y contract nac ar delerau ac amodau staff cymorth ar hyn o bryd.

Newidiadau cytundebol sy’n deillio o Ddeddf Hawliau Cyflogaeth 2025: 21 Medi 2026

Ymgynghoriad ar y Penderfyniad Drafft ar gyfer y Seithfed Senedd

Cynhaliodd y Bwrdd ymgynghoriad rhwng 15 Rhagfyr 2025 a 4 Chwefror 2026, i ofyn am safbwyntiau ar y Penderfyniad drafft symlach newydd ar gyfer y Seithfed Senedd. Roedd yr ymgynghoriad hefyd yn cynnwys nifer cyfyngedig o gynigion polisi a chodiadau ar sail chwyddiant i gyflogau a chyllidebau ar gyfer 2026-27.

Cyhoeddodd y Bwrdd ei adroddiad ar ymgynghoriad y Penderfyniad ar gyfer y Seithfed Senedd ar 30 Mawrth 2026.

Tâl Cadeiryddion Pwyllgorau sy’n Rhannu Swydd

Cynhaliodd y Bwrdd ymgynghoriad rhwng 27 Chwefror a 11 Mawrth 2026, i ofyn am farn ar dâl cadeiryddion pwyllgorau sy’n 'rhannu swyddi'.

Cyfarfu'r Bwrdd ddydd Iau 19 Mawrth i drafod yr ymatebion a gafwyd i'r ymgynghoriad. Ceir rhagor o wybodaeth am benderfyniadau a wnaeth y Bwrdd ar hyn, a materion eraill, yn eu llythyr diweddaru ar gyfer cyfarfod y Bwrdd ym mis Mawrth.

Yn dilyn hynny, mae'r Bwrdd wedi cyhoeddi datganiad Penderfyniad eithriadol o dan adran 14(4) o Fesur Cynulliad Cenedlaethol Cymru (Taliadau) 2010.

Cynnig i ymestyn y dyddiad cau ar gyfer gweithredu'r adolygiad o gyflogau a graddfeydd staff

Cafodd yr holl Aelodau o'r Senedd lythyr ar 22 Rhagfyr 2025 yn dilyn materion a phryderon a godwyd ynghylch yr heriau o weithredu'r fframwaith cyflogau a graddfeydd cyn dechrau tymor y Seithfed Senedd.

Cynhaliodd y Bwrdd ymgynghoriad rhwng 22 Rhagfyr 2025 a 16 Ionawr 2026, i geisio safbwyntiau ynghylch a ddylid ymestyn y dyddiad cau ar gyfer gweithredu'r fframwaith cyflogau a graddfeydd tan 30 Mehefin 2026.

Cyfarfu'r Bwrdd ddydd Mercher 21 Ionawr i drafod yr ymatebion a gafwyd i'r ymgynghoriad. Ceir rhagor o wybodaeth am benderfyniadau a wnaeth y Bwrdd ar hyn, a materion eraill, yn eu llythyr penderfyniad ar gyfer cyfarfod y Bwrdd ym mis Ionawr.

Yn dilyn hynny, mae'r Bwrdd wedi cyhoeddi datganiad Penderfyniad eithriadol o dan adran 14(4) o Fesur Cynulliad Cenedlaethol Cymru (Taliadau) 2010.

Adolygiad o'r Penderfyniad ar gyfer y Seithfed Senedd

Gwnaeth y Bwrdd ei benderfyniadau allweddol ynghylch cyflogau Aelodau a chyllidebau busnes a staffio ar gyfer y Seithfed Senedd ym mis Gorffennaf 2025.