Mae’r Bwrdd Taliadau wedi cyhoeddi ei ymgynghoriad ar newidiadau cytundebol sy’n deillio o Ddeddf Hawliau Cyflogaeth 2025.
Mae’r ymgynghoriad hwn yn ymwneud â diweddaru’r contractau safonol ar gyfer staff cymorth yr Aelodau fel eu bod yn adlewyrchu hawliau cyflogaeth newydd. Mae’r Bwrdd yn gofyn am farn yn unig ar y newidiadau cytundebol penodol sydd eu hangen i fodloni’r gofynion statudol newydd.
Mae Deddf Hawliau Cyflogaeth 2025 yn nodi hawliau statudol newydd i weithwyr a gofynion newydd ar gyflogwyr.
Mae’r Bwrdd yn gosod y contract safonol ar gyfer staff cymorth drwy’r Penderfyniad, yn adran 7.1.1b. Mae angen i’r contract safonol adlewyrchu’r hawliau statudol newydd fel bod y sefyllfa yn glir ac yn gyson, ac fel y gall Aelodau gyflawni eu dyletswydd fel cyflogwr cyfrifol o dan Reol 11 o’r Cod Ymddygiad.
Felly, mae’r Bwrdd yn cynnal ymgynghoriad cyfyngedig ar newidiadau penodol i’r contractau Parhaol a Chyfnod Penodol. Mae angen y newidiadau hyn i adlewyrchu gofynion statudol newydd a rhaid eu cyflwyno’n gyflym. Nid yw’r Bwrdd yn ceisio barn ehangach ar y contract nac ar delerau ac amodau staff cymorth ar hyn o bryd.
Nid yw’r ymgynghoriad hwn yn cwmpasu newidiadau ehangach i’r contract safonol nac i delerau ac amodau staff cymorth.
Mae rhagor o wybodaeth am y Penderfyniad ar gael ar wefan y Bwrdd.
Datgelu gwybodaeth
Dylech sicrhau eich bod wedi ystyried polisi preifatrwydd y Bwrdd cyn cyflwyno gwybodaeth i’r Bwrdd.
A fyddech cystal ag anfon eich ymateb erbyn 12:00 ddydd Gwener 18 Medi 2026. Efallai na fydd y Bwrdd yn gallu ystyried ymatebion a ddaw i law ar ôl y dyddiad hwn.
E-bostiwch eich barn i Taliadau@senedd.cymru.