Mae Bwrdd Taliadau Annibynnol y Senedd wedi cyhoeddi ei Benderfyniad terfynol ar gyfer y Seithfed Senedd. Mae hyn yn cwblhau adolygiad aml-flwyddyn o’r cymorth ariannol a’r adnoddau sydd ar gael i’r Aelodau a’u staff ar gyfer y tymor seneddol nesaf.
Nod y Penderfyniad terfynol yw bod yn gliriach, yn fwy hygyrch ac yn fwy tryloyw, gan gefnogi Aelodau i gyflawni eu rolau yn effeithiol tra’n sicrhau gwerth am arian.
Mae’r Penderfyniad yn adlewyrchu’r gwaith helaeth a wnaed drwy gydol y Chweched Senedd o ran casglu tystiolaeth ac ymgysylltu. Roedd hyn yn cynnwys tri ymgynghoriad cyhoeddus, mewnbwn gan randdeiliaid, a gwaith dadansoddi manwl i geisio diwallu anghenion Senedd â 96 o Aelodau, ffiniau etholiadol newydd a ffyrdd newydd o weithio.
Dywedodd Dr Elizabeth Haywood, Cadeirydd y Bwrdd Taliadau Annibynnol:
“Rydym yn falch o gyhoeddi’r Penderfyniad terfynol ar gyfer y Seithfed Senedd.
“Ein nod drwy’r broses gyfan oedd sicrhau bod gan yr Aelodau a’u staff y tâl a’r cymorth priodol i fodloni gofynion Senedd sy’n newid. Mae’r Aelodau’n chwarae rhan hanfodol yn ein democratiaeth, ac rydym yn darparu costau staffio a busnes er mwyn iddynt allu cyflawni eu gwaith o ddwyn y Llywodraeth i gyfrif, deddfu i Gymru, cytuno ar drethi yng Nghymru, ac ymgysylltu â’u hetholwyr a’u cynrychioli.”
“Mae’r Penderfyniad yn cynnig yr hyblygrwydd sydd ei angen i ymateb i anghenion y Senedd yn y dyfodol, ynghyd â mesurau diogelwch cymesur a strwythurau clir i sicrhau bod y system yn parhau i fod yn dryloyw, yn gadarn ac yn gynaliadwy.”
“Nod ein penderfyniadau yw cynnal atebolrwydd a sicrhau gwerth am arian i’r trethdalwr, o fewn cyd-destun amgylchiadau ariannol ehangach Cymru.”
Mae’r Penderfyniad ar Gyflogau, Staffio a Chymorth Busnes yr Aelodau 2026-27 bellach ar gael ar wefan y Bwrdd.
DIWEDD
Nodiadau i olygyddion
Gall Tîm Newyddion Comisiwn y Senedd hwyluso ceisiadau am ragor o wybodaeth. Cysylltwch ar 0300 200 7487 neu newyddion@senedd.cymru
Cadarnhaodd y Bwrdd ei benderfyniadau ar gyflogau Aelodau a staff ar gyfer y Seithfed Senedd ym mis Gorffennaf 2025.
Mae’r Bwrdd yn gorff annibynnol sy'n gyfrifol am sicrhau bod y tâl a'r adnoddau cywir ar gael i Aelodau o’r Senedd fel y gallant gyflawni eu rôl. Mae hyn yn cynnwys pennu cyflogau’r Aelodau yn ogystal â'u cymorth ariannol arall, megis costau staffio a swyddfa.
Mae cyfres o egwyddorion a ddiffiniwyd yn glir yn sail i waith y Bwrdd:
- dylai cymorth ariannol a thâl yr Aelodau gefnogi diben strategol y Senedd a hwyluso gwaith ei Haelodau;
- rhaid i benderfyniadau fod yn briodol yng nghyd-destun enillion yng Nghymru ac amgylchiadau ariannol ehangach Cymru;
- rhaid i’r system o gymorth ariannol i’r Aelodau fod yn gadarn, yn glir, yn dryloyw, yn gynaliadwy ac yn gynhwysol, a rhaid iddi gynnig gwerth am arian i’r trethdalwr.