Bwrdd Taliadau Annibynnol y Senedd

Mae Bwrdd Taliadau Annibynnol y Senedd yn gorff annibynnol sy'n gyfrifol am sicrhau bod gan Aelodau'r Senedd y tâl a'r adnoddau priodol sydd ar gael iddynt i ymgymryd â'u rôl. Mae hyn yn cynnwys pennu cyflogau Aelodau yn ogystal â'u lwfansau eraill fel costau staffio a chostau swyddfa.

Ategir gwaith y Bwrdd gan gyfres o egwyddorion sydd wedi'u diffinio'n glir:

• cymorth ariannol a chydnabyddiaeth ariannol i Aelodau gefnogi diben strategol y Senedd a hwyluso gwaith ei Haelodau;
• rhaid i benderfyniadau fod yn briodol yng nghyd-destun enillion Cymru ac amgylchiadau ariannol ehangach Cymru;
• rhaid i'r system o gymorth ariannol i Aelodau fod yn gadarn, yn glir, yn dryloyw, yn gynaliadwy, yn gynhwysol, ac yn cynrychioli gwerth am arian i'r trethdalwr.

Mae rhagor o wybodaeth am waith y Bwrdd ar gael ar y safle hwn.

Penodir aelodau’r Bwrdd gan Gomisiwn y Senedd am gyfnod penodol o bum mlynedd. Amlinellir aelodaeth y Bwrdd presennol isod.

Dr. Elizabeth Haywood

Michael Redhouse

Dame Jane Roberts

Hugh Widdis

NEWYDD - Recriwtio ar gyfer swyddi gwag ar Fwrdd Taliadau Annibynnol y Senedd.

Mae Clerc Comisiwn y Senedd wrthi’n recriwtio ar gyfer nifer o swyddi gwag ar y Bwrdd.

Mae gan y Bwrdd un swydd wag ar unwaith, yn sgil ymddiswyddiad y Gwir Anrhydeddus Arglwydd Hanson o’r Fflint. Ar gyfer y swydd hon, mae Comisiwn y Senedd yn chwilio am aelod o’r Bwrdd sydd â phrofiad gwleidyddol fel cyn wleidydd etholedig.

Bydd gan y Bwrdd ddwy swydd wag yn y dyfodol pan fydd tymor dau aelod o’r panel yn dod i ben ym mis Medi 2025.

I gael rhagor o wybodaeth, gan gynnwys y Pecyn Gwybodaeth i Ymgeiswyr a manylion am y broses recriwtio, ewch i’r adran Penodiadau Cyhoeddus ar wefan y Senedd.